Pagiparangni Bakrimani

ABDK-ni itihasko niatgenchimode, A∙chik a∙songo mondolirang ong∙bahaon Me∙chikrangni Dol aro Chadamberangni Dol ia dolgniko pagitchamrangni chasongonin bilakbeen rikbaanirangko aro uamangni batanggimin aro ia chasongo dingtang dingtang Kristoni kamrangko uamangni chu∙sokatenganiko nikna man∙enga. Uamang an.tangtangni gisepo giljarangko aro Isolko olakianirangko dakna man∙enga. Indioba pagiparangde uamangni gisepo indake olakipana aro Isolo damsan bi∙rimpana chol ra∙na namen ja∙manchakbeenga ine nikgen. Ia ong∙a obostarangko nipilate mondolini pamongrang aro dilgiparang pagiparangnaba dingtang dolko bikotna nangnikaha. Uni gimin Pamong  Mr. Balsrang A. Sangma, 2016 bilsini July jani 17 tariko Robibar salni gilja jokani ja∙man Me∙chik Dol aro Chadambe dolrangni mikkango Pagiparangni Dol ba Fathers Fellowshipko Pagipa, Degipa aro Gisik Rongtalgipani bimingo pakwatan baksa a∙bachengate on∙aha. Isolna rasong ong∙china.

Ia  Fellowshipko a∙bachengatani miksonganiara pagiparang maikai apsan tom∙dake Isolko olakina aro bi∙rimna man∙gen, saksa sakgipinko didigrikna, de∙mesana, Isolni kattarangko skie ra∙na aro practical dakna ong∙a. Uarangsan ong∙aigija, bebera.anio aro gisikni bidingo bilgrigiparangko bilakatna, mangrakatna aro giljaona re.bana aratgiparangko aro napchipe donggiprangko giljaona rimbana kam ka∙na  miksonganian ong∙a.